AN SURIGAONON SA JAGAN NAN PANAHON

An Surigaonon, an karajaw nan iton
Gani an ija pagkamahipa-ubsanon
Gipahimuslan nan mga hingayo sa gahom
An matinabangon na si Rajah Siagu
Gihigaya an mga bisita
Blood Compact ni Legazpi sanan Humabon
Ija gipahigayon
Jatis! Sa kadugay baja hinay-hinay
Ato mga katiguyangan gipamatay

Pero bantay kamo kay
Maisog an mga Surigaonon
Di mutalaw an mga taga-Siargao
Sa mga pirata na mga langyaw

An mga Katsila nakatilaw
Nan kahait nan mga sundang
An Commandacia gibija-an
Sa Espanya ngadto mijagan
Kay ming-abot an mga nag-rebolusyon
Na gipanguyohan nan mga
Gonzales na mga Gigaquitnon

An mga mananakop na mga Kano,
Sila gipangkayasan
Sa kaisog nila Mosende, Concepcion, Sison
Wayay undang an pagsulong
Nagginukdanay pasingod sa Danaw
Pero di magpalupig an mga Mainitnon
Girakrakan sa Magpayang an manmalupigon
An ila pandaug-daog sa Socorro
Gibaslan dajon, an mga puti gipantumba
Nan mga Kolurom

Pag-abot nan mga Sakang
Si Tahid nan Tubod an mipakgang
Sa mga pantamas-tamas sa ato katiguyangan
Maglisod si McArthur pagtugdang
Ija saad di unta matuman
Kay kun waya an mga mata nan mga Dinagatnon
An giyera nan Surigao Strait di nagmadaugon

Tapos na unta an giyera,
Pilipinas republika na
An Surigao na unay ra
Gihimo nan duha
Waya na an diktadura,
Si Erap napaiwat na
An Surigao natuyo na

Mga langyaw mingbalik
Dagko na mga bayod
Sa Siargao giduyod,
An mabuyawanon na mga bukid
Sa Placer, sa Claver gikumkom
An buotan na mga Surigaonon
Migakos sa ila dajon
An mga buyawan, mga puti na baybay
Nalampornas hinuon


Muabante kuno, mupadajon daw
Kampanya nan mga pulitiko
Rebulusyon gihapon
Singghit na mga Wayhon
Pero kadaghanan sa mga Surigaonon
Nagtuwaw sa kawad-on
Ila mga kayag pamaliton, hadlokon
Nan mga hingayo sa gahom
Surigaonon, hingas na!
An ato karajaw ibalik ta,
An karajawan isabwag na!

Justice for Defenders of Parang-parang!

An miagi na buyan, nakabasa ako nan mayaot na balita sa http://www.surigaocity.gov.ph/forums/index.php/topic,588.0.html,

amo ini:
------
Topic Name: Parangparang Watershed Reply #10 on: March 19, 2009, 02:50:45 pm
waterboy
Full Member
--------------------------------------------------------------------------------
another life was abruptly taken in the name of Parangparang.

Gary Salimbagat, a SMWD employee assigned in Parangparang for over 20 years, while doing the landscaping project of his barangay, was shot in cold blood by four young unknown individuals in front of his wife and neighbors yesterday at 2 pm. the assasins fled on foot towards the mountains of bgy mati. he was 48.------

An Parang-parang an tuburan nan tubig na ginainom sa Surigao City. An problema may mga "small-scale mining" sanan "illegal logging" sa lugar na naghatag nan peligro sa tubig. Peligro kay an pamiling makadaya nan "mercury." Makuyba kay an pagkahurot nan mga kahoy, makauga nan tuburan.

Kun timbangon nato, hamay mas mabug-at an karajawan nan mga Surigaonon na nagsalig sa tubig sa Parang-parang o an mga mamilingay sanan mga mantrosohay?

Amo na ginapaiwat an mga namilingay (miners) sanan mga mantrosohay. Nakay may mga mindapig sa mga namilingay sanan mga mantrosohay. Ginahadlok an mga forest rangers sa Parang-parang.

An miagi na duha ka tuig, gisaka sa DENR employees, iban nan mga pulis an Parang-parang, para paiwaton an mga mamilingay. Pag-uli nila, gi-sniper sila. Duha ka pulis, tumba dajon. Patay.

An miagi na buyan, si Gary Salimbagat, na taga-SMWD, an pinakabag-o na martyr para sa Parang-parang.

Unta dili makalimtan nan Surigao City Government, DENR sanan SMWD o kita mismo mga Surigaonon na pasindunggan an mga pulis sanan si Gary Salimbagat na napatay para malimpyo an Parang-Parang...

Unta an mga human rights organizations sanan church-based social action groups mukondena sa panghitabo kay an mga Surigaonon may katungod man na muinom nan malimpyo na tubig...

Ig-ampo nato na an ila kamatayon makapahinuktok, labaw na, makapaisog sa mga Surigaonon na mutindog para sa Parang-parang.

HADKAN

Hadkan ko kaw
Ajaw ako lamparuha
Kay tininuod ini
An ako pagbati maputli
Hadki sab ako
Kun nayujag kaw sa ako
Ajaw kasipog
Kay imo iton katungod
Dali iban
Mukadto kita
Sa mangitngit na dapit
Na wayay makakita
Iwagan nato
An kadugyom
Nan pagkayujag
Na nagsiga-siga.